Fimmtándi Litháinn í haldi lögreglu

Lögreglan á höfuðborgarsvæðinu handtók í gær fimmtánda Litháann sem talinn er tengjast umfangsmiklum þjófnaði í verslunum hér á landi. Sá var handtekinn eftir húsleit lögreglu í austurbænum en þar lagði lögregla hald á enn meira þýfi.

Að sögn Ómars Smára Ármannssonar, yfirmanns auðgunarbrotadeildar lögreglunnar, verður tekin afstaða til þess að nú um hádegisbil hvort farið verður fram á gæsluvarðhald yfir manninum.

Eins og fram hefur komið í fréttum voru 14 Litháar handteknir á þriðjudag og miðvikudag og voru níu þeirra úrskurðaðir í vikulangt gæsluvarðhald og fjórir í farbann. Hald hefur verið lagt á ýmiss konar varning úr verslunum en að sögn Ómars Smára liggur enn ekki fyrir hvert verðmæti varningsins sé.

Rannsókn málsins er enn í fullum gangi og snýr hún meðal annars að því hvort þjófarnir hafi ætlað að senda þýfið til Litháens. Lögreglan stöðvaði póstsendingar sem áttu að fara til Litháens og lögreglan þar í landi rannsakar nú hverjir standi fyrir sölu þýfisins þar.