Íslendingum meinað að koma inn í Bandaríkin vegna gamalla dóma

Sakaskrá margra Íslendinga virðist með einhverjum hætti hafa ratað í hendur bandarískra stjórnvalda að sögn Álfheiðar Ingadóttur, þingmanns Vinstri grænna. Dæmi eru um að íslenskum ríkisborgurum sé meinað að koma inn í Bandaríkin vegna áratuga gamalla dóma að hennar sögn.

Álfheiður hefur nú lagt fram fyrirspurn á Alþingi til dómsmálaráðherra hvort íslensk stjórnvöld hafi veitt bandarískum stjórnvöldum liðsinni um öflun upplýsinga vegna refsidóma sem fallið hafa í málum íslenskra ríkisborgara. Fyrirspurn Álfheiðar nær til síðastliðinna fimmtán ára.

„Ég veit til þess að fólki hefur verið meinað að koma inn í Bandaríkin vegna gamalla dóma," sagði Álfheiður í samtali við Vísi. „Þetta eru gamlir dómar sem ekki eru aðgengilegir og ekki hægt að finna á Netinu. Því velti ég því fyrir mér hvernig þessar upplýsingar hafa ratað í hendur Bandaríkjamanna."

Álfheiður segir það vera alvarlegt mál ef í ljós kemur að íslensk stjórnvöld hafi gefið slíkar upplýsingar til Bandaríkjanna. „Það væri einnig alvarlegt ef gömul mál á sakaskrá sem ættu að vera orðin löngu fyrnd eru allt í einu orðin ástæða þess að menn fá ekki að fara inn í landið."