Ákærður fyrir að aka of hægt

Lögreglan á Suðurnesjum hafði í gærkvöld afskipti af ökumanni á Hafnargötunni í Reykjanesbæ sem ók svo hægt að lögregla mat það svo að hann væri að tefja umferð vísvitandi.

Löng bílaröð myndaðist fyrir aftan bíl mannsins en þar á meðal voru lögreglumenn á ferð. Lögreglan stöðvaði því för hans sem reyndist ekki erfitt enda var hann á fimm til tíu kílómetra hraða á klukkustund þar sem hámarkshraðinn er 50 kílómetrar á klukkustund.

Maðurinn gaf þær skýringar að hann væri á rúntinum og að hann gerði sér grein fyrir að hann hefði tafið umferð. Lögregla hyggst kæra manninn fyrir uppátækið enda segir hún að háttsemi sem þessi geti skapað mikla hættu og óþægindi þar sem framúrakstur sé líklegur við þröngar aðstæður.