Ólafur Ragnar sat í heiðursstúku við hlið forseta Kína á Special Olympics

Forseti Íslands Ólafur Ragnar Grímsson og Dorrit Moussaieff forsetafrú fylgdust í dag með keppni íslensku þátttakendanna á Special Olympics í Shanghai og heimsóttu keppnisstaði.

Í kvöld tóku þau þátt í sérstakri fjölskylduhátíð sem haldin var til heiðurs íslensku keppendunum, fjölskyldum þeirra, þjálfurum og fararstjórum Íþróttasambands fatlaðra.

Í gær kynnti forseti sérstaka yfirlýsingu sem samþykkt var við lok alþjóðlegrar ráðstefnu um velferð þroskaheftra, en hana sóttu um 1.000 áhrifamenn og sérfræðingar hvaðanæva úr veröldinni.

Í fréttatilkynningu frá skrifstofu forseta Íslands segir að mikil ánægja og gleði ríki meðal íslensku þátttakendanna og fjölskyldna þeirra. Leikarnir séu þeim einstakt ævintýri og hin glæsilega opnunarhátíð ógleymanleg.

Í samræðum við forsetahjónin lýstu margir keppendur því að heimsmótið í Shanghai væri hápunkturinn á ferli þeirra innan Íþróttasambands fatlaðra.

Á setningarathöfn leikanna voru um 80.000 áhorfendur en henni var jafnframt sjónvarpað til 80 landa og er talið að um milljarður manna hafi horft á hana.

Forseti Íslands sat í heiðursstúku við hlið forseta Kína og fögnuðu þeir báðir hinum íslensku þátttakendum þegar þeir gengu inn á leikvanginn.

Keppendur frá 165 þjóðum taka þátt í leikunum.