Lögreglan fylgist með veitingastöðum en vissi ekki af einkadansi

Lögreglan á höfuðborgarsvæðinu heldur úti skipulögðu eftirliti með veitingastöðum á höfuðborgarsvæðinu en embættið eltir ekki fréttir fjölmiðla. Þetta segir Stefán Eiríksson, lögreglustjóri í samtali við Vísi þegar hann er spurður út í frétt Vísis þess efnis að einkadans sé enn stundaður á nektarstaðnum Goldfinger í Kópavogi þrátt fyrir að blátt bann liggi við því.

Stefán vildi ekki tjá sig um hvernig eftirliti með einstaka stöðum væri háttað og hann vildi ekkert segja um frétt Vísis frá því fyrr í dag. „Við höfum eftirlit með starfsemi veitingahúsa á höfuðborgarsvæðinu og við höfum gripið til aðgerða þegar starfsemin fer í bága við lög og reglur eins og fram hefur komið í fjölmiðlum."

Að sögn Stefáns eru mál annara nektarstaða á höfuðborgarsvæðinu í ákveðnu umsóknarferli og þar má því dansa nektardans enn sem komið er. Hann tekur þó fram að einkadans sé bannaður í landinu öllu.

Aðspurður hvort lögreglan ætli að bregðast við fréttum Vísis í dag af einkadansi á Goldfinger sagðist Stefán ekki vilja svara því. „Við byggjum þessa vinnu okkar ekki á upplýsingum úr fjölmiðlum," segir Stefán Eiríksson.