Segir sjálfstæðismenn hafa völd umfram kjörfylgi

Völd sjálfstæðismanna í ríkisstjórninni eru langt umfram kjörfylgi að mati Bjarna Harðarssonar, þingmanns Framsóknarflokksins. Þetta kom fram í máli Bjarna á Alþingi í dag.

Bjarni skaut föstum skotum að Sjálfstæðisflokknum í umræðu um fjárlögin á Alþingi í dag og sakaði þá meðal annars um samráðsleysi í tengslum við mótvægisaðgerðir ríkisstjórnarinnar . Sagði hann sjálfstæðismenn hafa eignað sér sum ráðuneyti og völd þeirra hefðu um langt skeið verið langt umfram kjörfylgi.

Kristján Þór Júlíusson, þingmaður Sjálfstæðisflokksins, vísaði gagnrýni Bjarna á bug og sagði hana með ólíkindum. Bað hann Bjarna sem þingmann Framsóknarflokksins um að líta eigin barm áður en hann setti fram gagnrýni af þessu tagi.