Bjarni verður ekki skipaður í eftirlitssveitina á Sri Lanka

Bjarni Vestmann, sendifulltrúi hjá utanríkisráðuneytinu var staddur á Sri Lanka til þess að kynna sér starfssemi og vinnuaðstæður norrænu vopnaeftirlitssveitanna í landinu. Til stóð að tilnefna hann í stöðu hjá sveitunum en af því verður ekki vegna þess að hann hitti leiðtoga Tamíltígrana án heimildar frá ráðuneytinu.

Gréta Gunnarsdóttir hjá utanríkisráðuneytinu staðfestir í samtali við Vísi að yfirvöld á Sri Lanka hafi lýst áhyggjum sínum yfir heimsókn Bjarna á yfirráðasvæði Tamíltígrana. „Utanríkisráðherra Sri Lanka átti samtal við Ingibjörgu Sólrúnu Gísladóttir utanríkisráðherra í gærkvöldi og í framhaldi af því samtali sendu íslensk yfirvöld frá sér bréf þar sem beðist var afsökunar á atvikinu. Fundi ráðherranna lauk á vinsamlegum nótum" segir Gréta.

Hún segir að Bjarni hafi farið í heimsóknina í fylgd með norrænum eftirlitsmönnum en að aldrei hafi staðið til að Bjarni myndi hitta fulltrúa deiluaðila á eyjunni, hvorki frá Tamíltígrum né stjórnvöldum.

Yfirvöld á Sri Lanka hafa krafist þess að Bjarni verði sendur heim. Gréta segir að hann leggi af stað til Íslands í kvöld og að hann verði kominn á morgun. Heimferðin sé hins vegar samkvæmt áður ákveðinni ferðaáætlun.

Gréta segir að málinu sé lokið af hálfu utanríkisráðuneytisins og hún segist ekki búast við því að atvikið hafi áhrif á störf norrænu vopnaeftirlitssveitanna á Sri Lanka.