Landssöfnun til styrktar geðsjúkun hleypt af stokkunum

Guðlaugur Þór Þórðarson heilbrigðisráðherra tók í morgun við fyrsta K-lyklinum um leið og landssöfnun Kiwanishreyfingarinnar til styrktar geðsjúkum og aðstandendum þeirra hófst.

Söfnunin stendur fram á sunnudag og rennur ágóðinn að þessu sinni til þriggja málefna, Geðhjálpar, BUGL og Forma. Eftir því sem segir í tilkynningu frá Kiwanishreyfingunni verður gengið hús um allt land og lykilinn boðinn til sölu og þá verða sölumenn við verslunarmiðstöðvar og aðra fjölfarna staði. Auk þess verður leitað er til fyrirtækja um stuðning.

Sparisjóðirnir á Íslandi eru fjárvörsluaðili söfnunarinnar og má leggja málefninu lið með því að fara inn á heimabanka sparisjóðanna og millifæra. Hægt er að leggja inn á reikning söfnunarinnar; 1100-26-55000, kennitala 640173-0179. K-lykillinn verður ennfremur til sölu í öllum verslunum Bónuss og á þjónustustöðvum Olís dagana 4.-7. október.