Yfirvöld á Sri Lanka kvarta undan íslenskum sendifulltrúa

Utanríkisráðherra Sri Lanka hefur krafist þess að Bjarni Vestmann, sendifulltrúi utanríkisráðuneytisins, verði sendur úr landi fyrir að hitta talsmenn Tamíltígranna sem berjast gegn stjórnvöldum á Sri Lanka. Á heimasíðu á vegum fastanefndar Sri Lanka á skrifstofu Sameinuðu þjóðanna í Genf er sagt frá því að Ingibjörg Sólrún Gísladóttir utanríkisráðherra hafi í gær beðið yfirvöld í landinu afsökunar á atvikinu.

Á síðunni er sagt frá því að afsökunarbeiðnin hafi komið í kjölfar þess að kollegi Ingibjargar Sólrúnar frá Sri Lanka ræddi málið við hana í gærmorgun. Ráðherrann er sagður hafa mótmælt heimsókn Bjarna harðlega.

Þá segir einnig að í afsökunarbeiðninni frá ríkisstjórn Íslands hafi komið fram að ríkisstjórnin hafi ekki heimilað Bjarna að hitta uppreisnarmennina og að hann hafi valdið ríkisstjórninni miklum vonbrigðum með athæfi sínu.

Ekki hefur náðst í Ingibjörgu Sólrúnu Gísladóttur vegna málsins.