Skortur á flugmönnum gæti skapað vanda í flugi

Tilfinnanlegur skortur er á flugmönnum og tæknimönnum í Asíu, Afríku, Austur-Evrópu og Rússlandi og ef ekki verður tekið á honum er ljóst að áhætta skapast í flugi. Þetta kom fram í máli Williams R. Voss, framkvæmdastjóra Flight Safety Foundation, á alþjóðlegri flugöryggisráðstefnu sem lýkur í dag.

Fram kemur á vef samgönguráðuneytisins að Voss hefði einnig lýst áhyggjum vegna lággjaldaflugfélaga í sumum heimshlutum sem sinntu ekki öryggismálum nægilega vel. Fram undan væri að koma á svonefndu öryggisstjórnunarkerfi í flugi og hefðu mörg flugfélög og flugvallarekendur tekið upp slíkt kerfi.

Næsta skref væri að yfirvöld gerðu flugheiminum skylt að taka þau upp. Þá lýsti Voss yfir vaxandi áhyggjum af hugsanlegri hættu á árekstrum í loft og ljóst væri að sú endurnýjun á flugstjórnarkerfum beggja vegna Atlantshafsins sem framundan væri gæti haft áhættu í för með sér ef ekki tækist að samræma kerfin.

Þorgeir Haraldsson, yfirflugstjóri Icelandair, á sæti í einni ráðgjafanefnd FSF, og hann segir að þrátt fyrir vöxt í íslenskri flugstarfsemi hafi ekki verið skortur á flugmönnum hjá Icelandair.

Hann segir að flugmönnum félagsins hafi fjölgað mjög síðustu árin vegna aukins áætlunarflugs og síaukinna leiguflugsverkefna og meðalaldur við ráðningu hefði lækkað. Síðustu árin hafi verið sífellt erfiðara að ráða flugmenn með reynslu. Lítil reynsla nýliða og hraður uppgangur leiði óhjákvæmilega af sér reynsluminni flugstjóra.

Þá segir Þorgeir innanlandsflugið hafa verið ómetanlega uppeldisstöð og góðan skóla fyrir verðandi þotuflugmenn og vonar hann að með aukinni grósku þar verði aftur hægt að búast við góðum umsækjendum þaðan. Hann segir að Icelandair hafi síðustu misserin ráðið hærra hlutfall eldri flugmanna frá öðrum félögum án þess að hvikað sé frá kröfum um hæfnispróf þrátt fyrir að þeir hafi reynslu af þotuflugi.