Þörf á samstilltum umbætum á hagstjórninni

Ingibjörg Sólrún Gísladóttir, utanríkisráðherra og formaður Samfylkingarinnar, segir þörf á samstilltum umbætum á hagstjórninnni til að tryggja stöðugleika í efnhagslífinu. Þetta kom fram í máli Ingibjargar í utandagskráumræðu á Alþingi í dag. Hún segir ójafnvægi hafa einkennt hagstjórnina.

Steingrímur J. Sigfússon, formaður Vinstri grænna, var málshefjandi í utandagskráumræðu um efnhagsmál og hagstjórn á Alþingi í dag. Þar gagnrýndi hann hagstjórn ríkisstjórnarinnar og varaði við skuldasöfnun.

Í ræðu Ingibjargar Sólrúnar Gísladóttur, utanríkisráðherra, kom fram að þörf sé á samtilltum umbætum á hagstjórninni til að draga úr ójafnvægi og tryggja stöðugleika. Að hennar mati skýrist vandi hagstjórnarinnar að nokkru leyti af einhliða beitingu stýrivaxta af hálfu Seðlabankans. Það haldi gengi krónunnar háu sem síðan valdi auknum viðskiptahalla. Vaxtamunur milli landa dragi síðan til sín erlent skammtímafjármagn sem einnig stuðlar að háu gengi krónunnar. Bætti hún við að þetta sé vandi samfélags sem hafi sína eigin mynt.