Stærri Lagarfossvirkjun vígð

Nýr áfangi Lagarfossvirkjunar verður vígður á laugardaginn kemur. Hornsteinn að virkjuninni verður lagður af fjármálaráðherra Árna M. Mathiesen. Nýji áfanginn stækkar Lagarfossvirkjun úr 8 MW í rúm 28 MW og orkuframleiðsla RARIK samstæðunnar tvöfaldast, að því er fram kemur í tilkynningu.

Þar segir einnig að með tilkomu Kárahnjúkavirkjunar aukist rennsli í Lagarfljóti árið um kring og skapar sú breyting þær aðstæður að unnt var að stækkja virkjunina.

„RARIK tilkynnti fyrirhugaða stækkun til Skipulagsstofnunar í maí 2004 og var óskað eftir því að stækkun virkjunarinnar yrði undanþegin mati á umhverfisáhrifum," segir einnig í tilkynningunni. „Með úrskurði í júní 2004 féllst Skipulagsstofnun á ósk RARIK. Ekki bárust neinar kærur á ákvörðun stofnunarinnar.

Í tilkynningunni er sagt að framkvæmdin hafi haft mjög litla röskun á umhverfi í för með sér. „Í stórum dráttum má segja að utan frá séð hafi framkvæmdin falist í stækkun stöðvarhúss og dýpkun og breikkun aðrennslisskurðar," segir í tilkynningunni.

Virkjunarleyfi vegna stækkunar Lagarfossvirkjunar um allt að 20 MW var gefið út af þáverandi iðnaðarráðherra Valgerði Sverrisdóttur þann 11. janúar 2005 og þá um vorið hófust framkvæmdir sem nú er lokið.