Framsóknarmenn gagnrýna Ingibjörgu

Framsóknarmenn gagnrýndu utanríkisráðherra harðlega á fundi utanríkismálanefndar Alþingis í morgun. Telja þeir að ákvörðun ráðherra um að draga starfsmann friðargæslunnar í Írak til baka sendi röng skilaboð út í alþjóðasamfélagið. Eðlileg ákvörðun segir varaformaður nefndarinnar.

„Þetta var ekki ígrunduð ákvörðun," sagði Siv Friðleifsdóttir, alþingismaður, í samtali við Vísi. „Friðargæsluliðinn var starfandi innan verkefnis sem studdist við ályktanir öryggisráðs Sameinuðu þjóðanna. Á sama tíma og við sækjumst eftir setu í ráðinu erum við að draga okkur úr verkefninu. Þetta sendir alröng skilaboð út í alþjóðasamfélagið."

Siv bendir ennfremur á að friðargæsluliðinn hafi verið starfandi á vegum Nató samkvæmt beiðni frá Írökum. Því skjóti það ennfremur skökku við að á sama tíma og Íslendingar sækjast eftir loftvörnum frá bandalaginu erum við draga okkur út úr verkefnum á þess vegum.

Árni Páll Árnason, þingmaður Samfylkingarinnar og varaformaður utanríkismálanefndar, vísar gagnrýni framsóknarmanna á bug. „Það liggur núna fyrir stefnumörkun hvernig Ísland á að beita sér í friðargæsluverkefnum. Við ætlum okkur að sinna verkefnum á sviði borgaralegrar uppbyggingar. Þetta verkefni uppfyllti ekki þau skilyrði þar sem um var að ræða uppbyggingu í tengslum við herafla."