Rifu hús án tilskilinna leyfa

Deildarstjóri Mengunarvarna Reykjavíkurborgar rak upp stór augu þegar hann las á Vísi að hafið væri niðurrif á húsinu á Grenimel 46. Þar á bæ kannaðist nefnilega enginn við að hafa veitt tilskilin leyfi fyrir niðurrifinu. Fulltrúar mengunarvarna og vinnueftirlitsins mættu á svæðið í morgun og þar var farið yfir málið. Komust menn þá að þeirri niðurstöðu að réttast væri að halda niðurrifinu áfram þar sem ófært væri að láta húsið standa að svo komnu máli.

Lúðvík Gústafsson, deildarstjóri mengunarvarna borgarinnar segir að um ákveðinn miskilning hafi verið að ræða hjá verktakanum. Byggingafulltrúi veitti leyfi fyrir niðurrifinu árið 2005 en síðan þá hafi húsið skipt um eigendur og því var heimildin ekki í gildi. „Málið er komið í réttan farveg," segir Lúðvík. „Við höfum fengið umsókn um starfsleyfi sem verður afgreitt í dag. Ég fór á staðinn ásamt fulltrúa Vinnueftirlitsins og það verður séð um að þarna verði farið að settum reglum."

Meðal annars þurfa verktakarnir að girða lóðina af að framanverðu því hætta getur auðveldlega skapast á svæðinu fari börn að leika sér í rústunum.

Á lóðinni eru fyrirætlanir um að byggja þriggja hæða þríbýlishús.