Líkt og Kínaforseti væri með innkaupalista yfir samstarfsmál

Forseti Íslands segir engu líkara en Kínaforseti hafi verið með innkaupalista Íslendinga yfir samstarfsmál við Kínverja þegar forsetarnir tveir hittust á fundi í Sjanghæ í gær. Málefnin sem hafi borið á góma hafi verið margfalt fleiri nú en í heimsókn til Kína fyrir tveimur árum.

Ólafur Ragnar Grímsson með Hu Jintao, forseta Kína, í gær. Segir Ólafur að listi starfsbróður hans yfir samstarfsmál hafi nánast líkst innkaupalista. Jintao hafi meðal annars nefnt samvinnu á sviði lyfjaframleiðslu, flutninga, matvælaframleiðslu, geymslu og kælingu, á sviði verkfræði og tækni og jarðskjálftarannsókna og hugbúnaðar.

„Þegar ég kom hérna fyrir tveimur árum voru þetta kannski svona sex, sjö svið sem við vorum að tala um. Nú eru þetta einhvers staðar á bilinu 20-30 svið sem komu til umræðu á þessum fundi," sagði Ólafur Ragnar í samtali við Stöð 2 eftir fundinn.