Samskiptaerfiðleikar ástæða þess að samningum var sagt upp

Miklir samskiptaerfiðleikar urðu til þess að talmeinafræðingar hjá Talþjálfun Reykjavíkur sögðu sig af gildandi samningum við Tryggingastofnun. Það á þó ekki að koma í veg fyrir að foreldrar barna sem eru í þjálfun hjá fyrirtækinu fái styrk frá ríkinu að mati Daggar Pálsdóttur.

Talþjálfun Reykjavíkur sagði sig á dögunum af gildandi samningi við Tryggingastofnun. Ástæðan var langvarandi samskiptaerfiðleikar við Tryggingastofnun.

Dögg Pálsdóttir, lögmaður Talþjálfunar Reykjavíkur, segir að kvartað hafi verið undan því við Tryggingastofnun að Talfélag Reykjavíkur færi ekki að samningum. Málið var rannsakað af stofnuninni sem í kjölfarið gerði alvarlegar athugasemdir við störf fjögurra talmeinafræðinga og áminnti þá. Það var síðar dregið til baka.

Karl Steinar Guðnason, forstjóri Tryggingastofnunar, segir ástæðu þess að áminningin hefði verið dregin til baka vera að Tryggingastofnun hafi viljað halda friðinn.

Það gekk hins vegar ekki og nú tekur Tryggingastofnun ekki lengur þátt í kostnaði vegna talþjálfunar hjá Talfélagi Reykjavíkur. Dögg telur að þrátt fyrir að samningnum hafi verið sagt upp eigi börnin að fá styrk frá Tryggingastofnun. Hún segir heimild til þess í lögunum en reglugerð sem sett hafi verið þrengi lögin.