Tekist á í borgarstjórn

Snörp orðaskipti hafa verið á fundi Borgarstjórnar Reykjavíkur í dag á milli forseta Borgarstjórnar, Björns Inga Hrafnssonar og oddvita Samfylkingarinnar, Dags B. Eggertssonar um málefni Sundabrautar.

Í umræðu um Sundabrautina gagnrýndi Björn Ingi Hrafnsson ríkisstjórnina fyrir það að hafa skorið niður fjárframlög til Sundabrautar í fjárlögum næsta árs.

Dagur B. Eggertsson blés á þá gagnrýni og benti á að í ræðu Gísla Marteins Baldurssonar, formanns Umhverfisráðs og samherja Björns Inga í Borgarstjórn, hefði komið fram ekki væri hægt að verja peningum sem skornir hefðu verið niður í verkefnið á næsta ári þar sem umhverfismat, skipulag og hönnun tæki tíma og að Sundabraut væri í forgangi og í eðlilegum farvegi.

Björn Ingi svaraði þá að eftir áralanga gagnrýni Dags á fyrrverandi samgöngumálaráðherra, Sturlu Böðvarsson væri athyglisvert hve lítið bæri á gagnrýni á núverandi samgöngumálaráðherra Kristján L. Möller, flokksbróðir Dags, og að fjárframlög Samgönguráðuneytisins til vegamála á Höfuðborgarsvæðinu væru allt of lítil.