Vilja heimsmeistaraeinvígi Anands og Kramniks í borgina

Samþykkt var einróma á fundi borgarstjórnar í dag að leggja til að Reykjavíkurborg kanni í samvinnu við Skáksamband Íslands og jafnvel fleiri aðila hvort möguleiki sé að halda heimsmeistaraeinvígið í skák í hér á landi á næsta ári.

Fram kemur í greinargerð meirihlutans vegna málsins að Indverjinn og Íslandsvinurinn Vishy Anand hafi sigrað af miklu öryggi á heimsmeistaramótinu í skák, sem lauk í Mexíkó um helgina. Hinn nýi heimsmeistari leysir Rússann Vladimir Kramnik af hólmi sem á sínum tíma náði krúnunni með því að leggja sjálfan Kasparov.

Kramnik eigi rétt á einvígi við Anand eftir ár og geti þá endurheimt titilinn en slíkur viðburður sé tvímælalaust einhver mesti skákviðburður allra tíma. Fjölmörg rök mæli með því að Íslendingar bjóðist til þess að taka heimsmeistaraeinvígið að sér. Viðburðurinn muni vekja mikla athygli um allan heim og verða skáklífi á Íslandi gríðarleg lyftistöng.

Segir enn fremur í greinargerðinni að viðeigenda væri að fagna einvígisafmæli Fischers og Spasskys, en í ár eru 35 ár liðin frá því, með nýju heimseinvígi og undirstrika þannig stöðu Íslands og ekki síst Reykjavíkur sem skákborgar með afgerandi og eftirminnilegum hætti.