Skilorðsbundið fangesi fyrir eignaspjöll

Héraðsdómur Austurlands hefur dæmt konu í þriggja mánaða skilorðsbundið fangelsi fyrir eignaspjöll þegar hún reyndi að brjótast inn í verslun á Egilsstöðum í febrúar síðastliðnum.

Konan var einnig upphaflega ákærð fyrir þjófnaði á ýmsum fatnaði og verslunarvöru í félagi við aðra manneskju en ákveðið var að falla frá þeim hluta ákærunnar.

Konan játaði á sig eignarspjöllin en hún á að baki nokkurn sakaferil. Með brotinu rauf hún skilorð dóms sem hún hlaut í fyrra og var sá dómur tekinn upp og refsing ákveðin í einu lagi fyrir bæði mál eins og lög gera ráð fyrir.

Auk þess að dæma konuna í þriggja mánaða fangelsi, sem skilorðsbundið er til tveggja ára, voru ýmis verkfæri sem notuð voru í innbrotinu gerð upptæk með dómi, þar á meðal klaufhamar, skrúfjárn og hnífur.