Bankar rukka fyrir upplýsingar um reikningsstöðu

Flestir bankar hér á landi taka gjald fyrir að veita viðskiptavinum sínum upplýsingar um stöðu á reikningi þegar hringt er í þjónustuver. Gjaldið er á bilinu 100 til 65 krónur. Glitnir, einn banka, tekur ekkert gjald fyrir viðvikið. Framkvæmdastjóri Neytendasamtakanna leggur áherslu á að gjaldtaka bankanna í tilvikum sem þessum sé í samræmi við kostnað sem hlýst af.

Viðskiptavinir BYRS og SPRON þurfa að greiða 100 krónur fyrir þessar upplýsingar. Þeir sem eru með reikning hjá Kaupþingi eru rukkaðir um 65 krónur og viðskiptavinir Landsbankans greiða 95 krónur. Glitnir tekur hins vegar ekkert gjald fyrir að veita þessar upplýsingar í gegnum síma.

Sigurjón Gunnarsson hjá Landsbankanum segir að gjaldið sé fyrst og fremst hugsað til þess að auka hagræðingu innan bankans og fá fólk til þess að nýta sér aðrar leiðir við að fá upplýsingar um stöðu á reikningi sem séu hagstæðari fyrir bankann. Hann bendir á að hægt sé að hringja í sjálfvirkan þjónustusíma auk þess sem hægt sé að nálgast uplýsingarnar í heimabanka. Þá kostar ekkert að koma inn af götunni og biðja þjónustufulltrúa um upplýsingar um stöðuna. Þetta á einnig við um aðrar bankastofnanir.

Jóna Ann Pétursdóttir hjá SPRON tekur í svipaðan streng og Sigurjón og segir hún að þjónustuver bankans hugsað til ráðgjafar fyrir viðskiptavini en ekki til þess að svara fyrirspurnum af þessu tagi. Þá sé einnig hægt að fá þessar upplýsingar sendar í gegnum GSM síma.

Jóhannes Gunnarsson, framkvæmdastóri Neytendasamtakanna, segir að stefna bankanna hafi verið að taka gjald af þeim sem nýta sér þjónustu þeirra. Samtökin leggi hins vegar áherslu á að gjaldtakan sé í samræmi við kostnaðinn sem hlýst af þjónustunni. Honum finnst undarlegt miðað við röksemdafærslu bankanna að ekki sé þá einnig rukkað fyrir þessa þjónustu þegar viðskiptavinurinn fer í bankann í eigin persónu. „Ef þeir rukka ekki fyrir þetta í bankanum en bara í gegnum síma þá finnst manni rökin falla um sjálf sig."

Jóhannes segir það liggja fyrir að bankar hafi í síauknum mæli verið að taka þjónustugjöld af viðskiptavinum sínum og séu þau mál nú til skoðunar hjá nefnd sem viðskiptaráðherra skipaði á dögunum. „Við teljum að þessi gjöld verði að vera í samræmi við það hvað þjónustan kostar bankann og við teljum að í mjög mörgum tilvikum sé það ekki þannig," segir Jóhannes Gunnarsson, framkvæmdastjóri Neytendasamtakanna.