Haustrallið er hafið

Stofnmæling botnfiska að haustlagi eða haustrallið er hafið í 12. skipti. Haustrallið er eitt umfangsmesta rannsóknaverkefni Hafrannsóknastofnunarinnar, þar sem togað er á 380 stöðvum allt í kringum landið á 28 dögum.

Rannsóknasvæðið miðast við landgrunn Íslands, allt niður á 1500 m dýpi og er markmið rannsóknarinnar að meta stærð helstu fiskistofna við landið, með sérstakri áherslu á þorsk, ýsu, gullkarfa, djúpkarfa og grálúðu. Ennfremur er í leiðangrinum fylgst með bergmálsmælitækjum með tilliti til mögulegrar loðnugengdar.

Bæði rannsóknaskip stofnunarinnar, Árni Friðriksson og Bjarni Sæmundsson, taka þátt í verkefninu. Verkefnisstjóri er Kristján Kristinsson.