Niðurrif í Vesturbænum

Verið er að rífa hús númer 46 við Grenimel í vesturbæ Reykjavíkur. Til stendur að byggja 630 fermetra þríbýlishús á lóðinni. Húsið sem verið er að rífa er 217 fermetrar að stærð og í því voru tvær íbúðir. Það hefur staðið autt um langan tíma við litla hrifningu nágranna.

Á sínum tíma voru uppi fyrirætlanir um að byggja tæplega 800 fermetra einbýlishús á lóðinni sem auglýst hafði verið til sölu fyrir um 190 milljónir króna. Ekki varð af þeim fyrirætlunum og nú munu nýir aðilar vera komnir að framkvæmdinni.