Ekki eftir neinu að bíða með Sundabraut

Björn Ingi Hrafnsson borgarfulltrúi og stjórnarformaður Faxaflóahafna segir að það séu mikil vonbrigði að Sundabraut skuli ekki vera á verkefnaáætlun ríkisstjórnarinnar samkvæmt fjárlögum. "Faxaflóahafnir hafa lýst yfir vilja sínum til að reisa og reka Sundabraut. Ríkisstjórnin hefur svarað því til að það þurfi að fara með verkið í útboð. Það er ekki eftir neinu að bíða með það," segir Björn Ingi.

Björn Ingi segir að hann voni að frestun á byggingu Sundabrautar nú þýði ekki að hún hafi verið sett aftar á verkefnalista samgönguráðuneytisins. "Það eru mér sem borgarfulltrúa mikil vonbrigði að ekki skuli hafist handa við Sundabraut nú," segir Björn Ingi í samtali við Vísi. "Það er löngu orðið tímabært að hefjast handa við þessa samgöngubót fyrir höfuðborgina."

Fram kemur einnig í máli Björn Inga að það hljóti að vera sjálfsögð og sanngjörn krafa að íbúar á SV-horni landsins eiga sama rétt á hlutdeild í fjármagni til vegagerðar og aðrir landsmenn.