Sparkaði í andlit liggjandi manns

31 árs Selfyssingur var í dag dæmdur í fjögurra mánaða skilorðsbundið fangelsi fyrir að hafa í nóvember í fyrra veist að manni, slegið hann í gólfið og sparkað í andlit hans á skemmtistaðnum Pakkhúsið á Selfossi.

Maðurinn játaði sök og var dómurinn kveðinn upp í Héraðsdómi Suðurlands á Selfossi.

Þá var maðurinn einnig dæmdur fyrir umferðarlagabrot en hann var gripinn við stýrið eftir að hafa verið fyrir nokkru sviptur ökuréttindum ævilangt.

Vegna þessa var maðurinn dæmdur til að greiða tæpar níu hundruð þúsund krónur í sektir, málskostnað og skaðabætur.