31 milljarðs tekjuafgangur hjá ríkissjóði á næsta ári

Gert er ráð fyrir að tekjuafgangur ríkissjóðs verði 66 milljarðar á þessu ári og nærri 31 milljarður á því næsta samkvæmt fjárlagafrumvarpi fyrir árið 2008 sem kynnt var í dag.

Í fyrri hluta frumvarpsins er farið yfir stefnu og horfur í efnahagsmálum og bent er á að afkoma ríkissjóðs verði margfalt betri á þessu ári en gert hafi verið ráð fyrir í fjárlögum 2007, eða 66 milljarðar króna afgangur í stað níu milljarða afgangs.

Gert var ráð fyrir því í fjárlagfrumvarpi fyrir yfirstandandi ár að heildartekjur ríkissjóðs yrðu um 376 milljarðar en samkvæmt endurskoðaðri áætlun fjármálaráðuneytisins verða þær nærri 450 milljarðar. S

egir í frumvarpinu að skýringa á þessu megi meðal annars leita í því að fjármagstekjur hafi aukist vegna áframahaldandi hækkunar á eignaverði. Þá hafi tekjuskattur, tryggingagjöld og virðisaukaskattur aukist meira en reiknað var með. Það má meðal annars skýra með því að vöxtur einkaneyslu, launabreytingar og mannfjölgun hafi orðið meiri en reiknað var með.

Útgjöld aukast um átta prósent á milli ára.

Þegar horft er til næsta árs er gert ráð fyrir að tekjuafkoma ríkissjóðs verði jákvæð um ríflega 30 milljarða króna sem er mun betra en langtímaspá í síðasta fjárlagafrumvarpi gerði ráð fyrir. Þá var gert ráð fyrir að rekstur ríkissjóðs yrði neikvæður um fimm milljarða króna.

Gert er ráð fyrir að tekjur ríkissjóðs á næsta árið verði um 461 milljarður króna sem er 77 milljörðum króna meira en áætlun sem lögð var fram haustið 2006 gerir ráð fyrir. Útgjöld ríkissjóðs á næsta ári verða hins vegar um 430 milljarðar króna og aukast um átta prósent að raungildi á milli ára.

Aukning á útgjöldum stafar af mestu af auknum framlögum til mennta- og velferðarmála, en gert er ráð fyrir átaki í málefnum geðfatlaðra og kostnaði við stefnumörkun í málefnum barna og ungmenna. Enn fremur aukast útgjöld til menntamála, einkum vegna framlaga til háskóla og rannsóknarsjóða.

Þá tvöfaldast svokallaður stofnkostnaður ríkissjóðs á milli ára og er þar einkum um að ræða samgönguframkvæmdir eftir því sem segir í fjárlagafrumvarpinu. Ráðstöfun af söluandvirði Landsímans hefst fyrir alvöru og aukast framlög til vegamála um 14 milljarða, hafnamála um 1,4 milljarða og flugmála um 1,5 milljarða.

Þá nemur kostnaður við smíði varðskips og kaup á flugvélum fyrir Landhelgisgæsluna um tveimur milljörðum króna á næsta ári. Hins vegar er gripið til þess ráðs að fresta framkvæmdum við Sundabraut um 1,5 milljarða á næsta ári til þess að lækka útgjöldin ásamt því að lækka rekstrargjöld ýmissa stofnana og verkefna.