Viðurkennir að hafa hrekkt Ólínu

Gunnar Atli Gunnarsson, formaður Nemendafélags Menntaskólans á Ísafirði, hefur viðurkennt að hafa sent nemendum skólans smáskilaboð í nafni Ólínu Þorvarðardóttur fyrrverandi skólameistara. Jón Reynir Sigurvinsson skólameistari sagði í samtali við Vísi að Gunnar Atli hefði fengið áminningu frá skólanum vegna þessa og farið hefði verið fram á að hann segði sig úr stjórn nemendafélagsins.

Gunnar Atli bætti um betur og birti afsökunarbeiðni á vefnum Bæjarins besta. Hún er svohljóðandi. „Undirritaður vill koma á framfæri innilegri afsökunarbeiðni til dr.Ólínu Þorvarðardóttur fyrrverandi skólameistara á Ísafirði. Föstudaginn 19.september síðastliðinn sendi undirritaður SMS skeyti til hóps nemanda í Menntaskólanum á Ísafirði og lét líta svo út sem það hafi verið sent úr símanúmeri Ólínu. Sá gjörningur var hörmuleg yfirsjón og verður ekki réttlættur á nokkurn hátt. Með vinsemd og virðingu. Gunnar Atli Gunnarsson."

Gunnar vildi lítið tjá sig um málið við blaðamann Vísis. Hann sagði þó að hann hefði játað á sig sökina fljótlega eftir að skilaboðin voru send. Hann sagðist hafa verið í sambandi við Ólínu vegna þessa. „Við höfum sæst og erum vinir í dag," segir Gunnar Atli.