Vilja strætó um allan Eyjafjörð

Háskólinn á Akureyri kannar nú grundvöll þess að strætó aki um allan Eyjafjörð. Sveitarstjórnarmenn vilja fá stuðning frá ríkinu í það verkefni. Árið 1999 var flutt tillaga á Alþingi um strætó á Eyjafjarðarsvæðinu en þar búa um 25.000 manns. Málið hlaut ekki hljómgrunn þá, en í millitíðinni hefur ýmislegt breyst. Nemendum hefur meðal annars stórfjölgað við Háskólann á Akureyri.

Sveitarstjórn Eyjafjarðarsveitar hefur nú blásið nýju lífi í umræðuna. Bjarni Kristjánsson sveitarstjóri vill láta kanna á ný hvort grundvöllur sé fyrir víðtækum almenningssamgöngum í Eyjafirði.

Háskólinn á Akureyri er nú að dusta rykið af skýrslu sem unnin var um strætó í Eyjafirði árið 1999 og meta aðstæður upp á nýtt áður en framhald málsins skýrist. Miðað við gömlu skýrsluna verður kostnaður varla undir 100 milljónum á ári. Og sveitarstjórnarmenn telja að ríkið eigi að styrkja verkefnið.