Nýsköpunarkeppni grunnskólanemenda á morgun

Úrslit í Nýsköpunarkeppni grunnskólanemenda verða á hátíð sem hefst í Grafarvogskirkju klukkan 15 á morgun. Menntamálaráðherra setur keppnina sem 52 grunnskólar tóku þátt í. Forseti Íslands heldur ræðu og afhendir verðlaunin. Orka og umhverfi verða í fyrirrúmi í keppninni.

Þá verður sýning á uppfinningum barna sem komust í úrslit keppninnar í kapellu kirkjunnar. Þar má meðal annars finna sprunguvara, DVD hulstursopnara, loftræstan barnavagn, hátækni tölvumillistykki, hitabolla, þrýstiloftskó fyrir hreyfihamlaða, fólk með ökklaáverka, bangsarúm, sleifusleikju, uppskriftarhrærivél svo nokkuð sé nefnt. Þetta segir í tilkynningu aðstandenda keppninnar.

Verðlaunagripurinn er eftir fyrrverandi þátttakendur í keppninni, þær Dóróteu Höeg Sigurðardóttur og Klöru Jónasdóttur sem voru nemendur í Gnúpverjaskóla. Gripurinn, sem leysir þörfina á að halda hendi á lofti þegar aðstoðar kennara er þörf og kemst fyrir í skólatösku, er nú formlegur verðlaunagripur keppninnar.

Þetta er í 16. sinn sem keppnin er haldin, en nánari upplýsingar má finna á vef Nýsköpunarkeppni grunnskólanemenda.