Enginn stuðningur við börn sem eru fórnarlömb kynferðisofbeldis

Enginn stuðningur er við börn sem verða fyrir kynferðisofbeldi líkt og fyrir fullorðin fórnarlömb kynferðisbrota, fyrr en búið er að taka af þeim skýrslu fyrir dómi, segir hæstaréttarlögmaður. Brýnt sé að koma á úrræðum sem veiti börnum og foreldrum þeirra stuðning frá upphafi.

Steinunn Guðbjartsdóttir hæstaréttarlögmaður hefur verið réttargæslumaður fjölmargra fórnarlamba kynferðisofbeldis undanfarin ár. Hún segir sárlega vanta úrræði fyrir börn sem verði fyrir kynferðisofbeldi.

Börnum sé fyrst boðin viðtalsmeðferð eftir að tekin hefur verið af þeim skýrsla fyrir dómi eða í barnahúsi og oft geti liðið allt að tvær vikur. Yfirleitt sé um að ræða tilkynningar frá börnum löngu eftir að atburðurinn hafi átt sér stað.

Steinunn segir einnig stuðning vanta við foreldra fórnarlamba kynferðisofbeldis.