Endurheimting aflaheimilda forsenda mótvægisaðgerða

Forsætisráðherra segir forsendur mótvægisaðgerða vegna skerðingar þorskvótans vera þær að þeir sem tapi aflaheimildum fái þær aftur þegar kvótinn aukist á nýjan leik. Aðgerðirnar séu til þess að hjálpa þeim byggðarlögum sem eigi allt sitt undir þorskveiðum þangað til aflaheimildir komi til baka.

Það var fjölmennt á fundi Sjálfstæðisflokksins sem haldinn var í Valhöll í morgun. Þar fór Geir Haarde forsætisráðherra og formaður Sjálfstæðisflokksins yfir helstu áherslumál flokksins og ríkisstjórnarinnar fyrir komandi vetur. Hann nefndi umbætur og breytingar í heilbrigðis -og orkumálum. Þá sagði hann umbætur framundan í samgöngum og fjarskiptum.

Davíð Oddsson Seðlabankastjóri gagnrýndi mótvægisaðgerðir ríkisstjórnarinnar fyrir skömmu og sagði sérkennilegt að gripið væri til slíkra aðgerða þegar ekkert atvinnuleysi væri í landinu. Geir tók að hluta til undir þá gagnrýni en sagði að þegar kæmi að einstökum byggðarlögum, sveitafélögum og fyrirtækjum sem yrðu mest fyrir skerðingu þorskkvótans ætti slíkt ekki við rök að styðjast.