Sektaður fyrir að kýla nágranna

Héraðsdómur Reykjavíkur dæmdi í dag karlmann til greiðslu áttatíu þúsund króna í sekt vegan líkamsárásar á annan mann. Þá var hann jafnframt dæmdur til að greiða manninum rúmar 60 þúsund krónur í miskabætur. Maðurinn var ákærður fyrir að kýla fórnarlamb sitt í andlitið þannig að það marðist í framan.

Forsagan var sú að hinn ákærði hafði um miðja nótt barið á glugga og beðið hinn manninn og konu hans að hleypa sér inn í fjölbýlishús sem þau bjuggu öll í. Þá kom til orðaskipta á milli konunnar og hins ákærða. Bankaði hann upp á hjá fólkinu og fóru karlarnir tveir að munnhöggvast og lyktaði því með átökum milli þeirra.

Maðurinn bar því við að hann hefði slegið nágranna sinn í sjálfsvörn en á það féllst dómurinn ekki og sakfelldi hann sem fyrr segir. Horft var til þess við ákvörðun refsingar að afleiðingar árásarinnar voru ekki miklar og að maðurinn hafði aldrei áður komist í kast við lögin.