Heilsa kvenna forsenda efnahags- og félagslegra framfara

Ingibjörg Sólrún Gísladóttir utanríkisráðherra var í hópi leiðtoga sem ávörpuðu ráðherrafund um samþættingu alþjóðlegra öryggis- og heilbrigðismála, undir yfirskriftinni Global Health and Foreign Policy, sem haldinn var að frumkvæði Noregs og Frakklands í New York í gær.

Fram kemur í tilkynningu frá utanríkisráðuneytinu að Ingibjörg Sólrún hafi í ræðu sinni bent á að heilbrigði og öryggi væru nátengd nú á dögum nýrra ógnvalda, svo sem farsótta og sýklavopna. Þá áréttaði utanríkisráðherra að heilsa kvenna væri hvarvetna forsenda efnahagslegra- og félagslegra framfara, þar á meðal aðgengi að kynfræðslu og getnaðarvörnum.

Auk Ingibjargar Sólrúnar ávörpuðu meðal annars Ban Ki-moon, aðalritari Sameinuðu þjóðanna, Margaret Chan, framkvæmdastjóri Alþjóðaheilbrigðismálastofnunarinnar og Bernard Kouchner, utanríkisráðherra Frakklands, fundinn ásamt Jonas Gahr Störe, utanríkisráðherra Noregs, sem stýrði fundinum.