Á meðal frummælenda á heimsþingi Clintons

Forseti Íslands Ólafur Ragnar Grímsson var meðal frummælenda í umræðum um loftslagsbreytingar og orkumál á heimsþingi Bills Clintons fyrrum Bandaríkjaforseta. Þingið kallast Clinton Global Initiative og fer það fram þessa dagana í New York. Þangað mæta þjóðarleiðtogar víða að úr veröldinni, forystumenn alþjóðastofnana, vísindamenn, sérfræðingar, áhrifafólk í baráttusamtökum og fulltrúar fjölmiðla, að' því er segir í tilkynningu frá forsetaembættinu.

 

„Á heimsþinginu er fjallað um ýmis brýn vandamál sem efst eru á baugi og þar hefur farið fram víðtæk umræða um áhrif orkubúskapar heimsins á loftslagsbreytingar," segir í tilkynningunni. „Í umræðunum lagði forseti Íslands áherslu á að fordæmi Íslendinga sýndi að hægt er á fáeinum áratugum að hverfa frá notkun olíu og kola við framleiðslu á rafmagni og húshitun og festa í staðinn í sessi orkubúskap sem byggist á nýtingu hreinna orkugjafa."

 

Þá munforseti hafa rakið ýmis samstarfsverkefni sem Íslendingar taka þátt í víða um heim og nefndi sérstaklega „hitaveituverkefnið í Kína sem sýndi að hægt er að draga stórfelldlega úr mengun í kínverskum borgum með því að hverfa frá kyndingu með kolum og byggja í staðinn öflugar hitaveitur."