Talið er tryggingafélag flutningabíls beri ábyrgð á skemmdum

Tveir fólksbílar skemmdust mikið þegar þeir óku á stórgrýti, sem fallið hafði af tengivagni dráttarbíls á Kringlumýrarbraut á móts við Sigtún seint í gærkvöldi.

Engan í bílunum sakaði en annar þeirra sat fastur uppi á stórum steini. Grjót hafði fallið af bílnum á að minnstakosti 50 metra kafla og þurfti að kalla út vinnuvélar til að moka því upp á annan bíl, slökkviliðið til að hreinsa upp olíu sem lak af öðrum bílnum og bíla frá hreinsitækni til að spúla svæðið í lokin. Aðgerðin tók þrjár klukkustundir. Vitað er hver dráttarbíllinn er þótt hann hafi ekið af vettvangi og verður ökumaður hans yfirheyrður með aðstoð túlks í dag.

Óljóst er hver á að bera tjónið en í fljótu bragði virðist sem tryggingafélag malarflutningabílsins eigi að gera það og eigi það hugsanlega endurkröfu á ökumanninn.

Auk þess liggur að minnsta kosti 50 þúsund króna sekt við því að ganga ekki tryggilega frá farmi og hafa þó nokkrir ökumenn malarflutningabíla verið sektaðir að undanförnu í átaki lögreglu suðvestanlands til betri umbúnaðar.