Sakfelldur fyrir að smygla amfetamíni og sterum inn á Litla-Hraun

Héraðsdómur Suðurlands hefur sakfellt fanga á Litla-Hrauni fyrir fíkniefnabrot og brot á tolla- og lyfsölulögum fyrir að hafa reynt að smygla bæði amfetamíni og anabólískum sterum inn í fangelsið.

Maðurinn flúði í nóvember í fyrra frá fangavörslumönnum við Héraðsdóm Reykjavíkur þegar átti að færa hann fyrir dóm en gaf sig svo fram við fangelsismálayfirvöld á Litla-Hrauni tveimur dögum síðar. Við röntgenskoðun kom í ljós að hann hafði komið einhverjum pakkningum fyrir í endaþarmi sínum. Reyndust þær þrjár og höfðu að geyma um 180 töflur af sterum og nærri 40 grömm af amfetamíni.

Maðurinn játaði fyrir dómi að hafa haft amfetamínið í sinni vörslu en sagðist hafa talið að sterarnir væru fæðubótarefni sem ávísuð hefðu verið frá lækni til kunningja hans. Hann gat hins vegar ekki lagt fram nein gögn máli sínu til stuðnings. Taldi dómurinn að með tilliti til þeirrar aðferðar sem maðurinn notaði við að koma töflunum inn í fangelsið að það væri hafið yfir skynsamlegan vafa að hann vissi að um ólögleg efni væri að ræða. Var hann því sakfelldur fyrir það.

Maðurinn á að baki langan sakaferil og var síðast dæmdur í þriggja ára fangelsi í Hæstarétti í sumar, meðal annars fyrir fíkniefnabrot. Taldi dómurinn í ljósi þess að maðurinn hefði framið ofangreind brot í nóvember í fyrra að um hegningarauka að ræða. Með vísan til laga var honum ekki gerð refsing í málinu.