Staðan endurmetin ef forsendur eru brostnar

Árni Mathiesen fjármálaráðherra segir að ef það sé raunin að einhverjar af forsendunum fyrir mótvægisaðgerðum ríkisstjórnarinnar séu brostnar verði stjórnvöld að endurmeta stöðuna. "Hinsvegar tel ég ekki að svo sé í augnablikinu," segir Árni í samtali við Vísi.

"Það veldur alltaf áhyggjum þegar fjölda fólks er sagt upp í einu," segir Árni. "Hinsvegar er atvinnuástand mjög gott á þeim stöðum sem þetta gerðist nú og eftirspurn eftir starfsfólki. Ég á því von á að þetta fólk fái aðra vinnu og ég á einnig von á að heimamenn, það er sveitarstjórnirnar muni aðstoða við slíkt."

Nú hefur um hundrað manns verið sagt upp hjá tveimur fiskvinnslufyrirtækjum vegna skerðingar á þorskkvótanum. Bent hefur verið á að þegar mótvægisaðgerðirnar voru kynntar fyrr í haust hafi komið fram hjá ráðmönnum að þeir ættu ekki von á fjöldaatvinnuleysi í fiskvinnslunni fyrir áramótin.

Aðspurður um þetta segir Árni að þeir hafi byggt sitt sjónarmið þá á athugun sem Byggðastofnun hafi gert meðal útgerðar- og fiskvinnslufyrirtækja. "Þau svör sem þá fengust bentu ekki til að atvinnuleysi yrði vandamál fyrir áramótin," segir Árni. "Og ég ítreka að gott atvinnuástand á þessum stöðum vegur upp á móti þessum uppsögnum."