Mátti búast við uppsögnum

Einar K. Guðfinnsson, sjávarútvegsráðherra, harmar þær uppsagnir sem tilkynnt var um í dag á Eskifirði og í Þorlákshöfn. Hann segir að við þessu hafi mátt búast þegar ákveðið var að skera niður aflaheimildir í þorski.

Einar segist gera sér grein fyrir því að niðurskurðurinn leiði til atvinnuleysis á sumum stöðum og hann segir einnig ljóst að þær mótvægisaðgerðir sem ráðist hefur verið í munu ekki bæta skaðann að fullu.

„Þær aðgerðir miðast einmitt við að bæta stöðuna á þeim stöðum þar sem seglin eru að dragast saman," segir Einar. Hann segir ómögulegt að útiloka að fleiri uppsagnir eigi eftir að fylgja í kjölfarið. Niðurskurður á aflaheimildum hafi það óhjákvæmilega í för með sér að tekjur sjávarútvegsfyrirtækja dragist saman.

Einar segir einnig mikilvægt að sjá til þess að þegar takist hafi að byggja upp þorskstofninn, verði séð til þess að þeir aðilar sem verst verða úti núna fái að njóta þess þegar kvótinn verður aukinn.

Aðspurður hvort hann telji þörf á sértækum aðgerðum fyrir byggðalögin tvö, Eskifjörð og Þorlákshöfn, segist Einar ekki treysta sér til þess að tjá sig um atvinnuástandið á þeim svæðum. „Mótvægisaðgerðir ríkisstjórnarinnar hljóta þó að gagnast þeim byggðalögum eins og öðrum." segir sjávarútvegsráðherra.