Sýknudómi í nauðgunarmáli vísað aftur í hérað

Hæstiréttur ómerkti í dag sýknudóm Héraðsdóms Reykjavíkur yfir karlmanni sem ákærður var fyrir nauðga 13 ára stúlku og vísaði málinu aftur heim til héraðs.

Maðurinn var ákærður fyrir að hafa þröngvað stúlkunni til samræðis við sig í bíl árið 2005. Héraðsdómur taldi að framburður stúlkunnar um að mökin hefðu verið gegn hennar vilja hefði verið afar óljós. Hann benti ekki skýrlega til þess að maðurinn hefði beitt hana ofbeldi eða hótað henni ofbeldi eða að hann hafi mátt skynja af hegðun hennar að mökin væru gegn hennar vilja.

Hæstiréttur var ósammála héraðsdómi um að framburður stúlkunnar í skýrslutöku hefði verið óskýr um það hvort mökin hefðu verið gegn hennar vilja. Komið hefði skýrt fram í tilvitnuðum svörum stúlkunnar að mökin hefðu verið gegn hennar vilja og að hún segðist hafa gefið manninum það til kynna með ótvíræðum hætti.

Þá var tekið fram að hafi héraðsdómur talið vafa leika á hvort beitt hafi verið ofbeldi eða hótun um það í umrætt sinn hafi borið að veita sakflytjendum kost á að reifa málið út frá því hvort heimfæra ætti brot mannsins undir þágildandi ákvæði 195. greinar almennra hegningarlaga en ekki 194. grein eins og ákært var fyrir. Af framangreindum ástæðum var héraðsdómur ómerktur og málinu vísað heim í hérað til meðferðar og dómsálagningar að nýju.

Íþyngjandi að þrír dómarar voru við yfirheyrslu

Einn dómari, Ingibjörg Benediktsdóttir, skilað sératkvæði. Þar rekur hún framburð stúlkunnar fyrir dómi og telur að héraðsdómur hafi ekki tekið nægilegt tillit til hans. „Af þessu leiðir að niðurstaða héraðsdóms um sönnunargildi munnlegs framburðar fyrir dómi kann að vera röng svo að einhverju skipti um úrslit máls," segir í sératkvæðinu.

Þá átelur Ingibjörg að þrír héraðsdómarar hafi verið viðstaddir skýrslugjöf stúlkunnar fyrr í þessum mánuði í sérútbúnu herbergi sem ætlað er til að yfirheyra börn. „Í ljósi þess hversu íþyngjandi yfirheyrsla í kynferðisbrotamálum er fyrir barn hefði verið nægilegt að dómsformaður hefði annast yfirheyrsluna en meðdómsmenn fylgst með henni í þar til gerðu herbergi við hlið þess fyrrnefnda, enda gátu þeir beint því til dómsformanns að leggja spurningar um sakarefnið fyrir barnið hefðu þeir óskað þess," segir enn fremur í sératkvæðinu.