Segir lögregluembættin svelta

„Á undanförnum árum hefur almennum lögreglumönnum verið fækkað stórlega á götunum en fjölgað á skrifstofum ríkislögreglustjóra og í sérsveit sama embættis," skrifar Dagur B. Eggertsson borgarfulltrúi í Morgunblaðið í morgun.

Í samtali við Vísi sagði Dagur að þessi gagnrýni sín væri ekki ný. Hann hafi skrifað allmargar greinar um efnið. Í þeim greinum hefur Dagur meðal annars bent á að þriðjungi færri almennir lögreglumenn hafi verið við lögregluna í Reykjavík árið 2002 en árið 1976. Dagur segir að ástandið hafi skánað aðeins síðan þá og að nýr lögreglustjóri sé býsna sammála sér um áherslu á sýnilega löggæslu.

Björn Bjarnason dómsmálaráðherra svarar því til að sérsveitarmenn starfi á götum Reykjavíkur alla daga ársins og séu einnig til taks fyrir önnur lögreglulið þeim til styrktar. „Fullyrðing Dags um þetta efni afhjúpar vanþekkingu hans á hlutverki sérsveitarinnar," segir Björn í svari til Vísis. Hann vísaði á Embætti Ríkislögreglustjóra varðandi lögreglumenn þar.