Gríðarleg aukning kynferðisbrota í Árborg

Þrátt fyrir að enn sé september eru kynferðisbrot á málaskrá lögreglunnar í Árborg fyrir árið 2007 þegar orðin 28. Allt árið 2005 voru kærð kynferðisbrot hjá sama embætti 8. Þrátt fyrir þessa gríðarlegu aukningu er sami fjöldi lögreglumanna að störfum hjá rannsóknardeild lögreglunnar í Árborg og þegar málin voru aðeins átta.

Þorgrímur Óli Sigurðsson hjá rannsóknardeild lögreglunnar í Árborg segir þessa miklu aukningu megi rekja til Byrgismálsins annars vegar en átta kærur má rekja til þess á þessu ári. En hins vegar til þess þegar lögregluambættin í Vestmanneyjum og á Hvolsvelli voru sameinuð lögregluembættinu í Árnesi.

Það sem vekur athygli er að við hina miklu skipulagsbreytingu og allann þann þunga sem lagður var á rannsóknardeildina í Árborg vegna hennar, er að sami fjöldi lögreglumanna starfar hjá deildinni nú, þegar málin eru 28 og árið 2005, þegar málin voru aðeins 8. Þrír lögreglumenn starfa hjá rannsóknardeildinni.

Þorgrímur Óli segir að þegar hugmyndin um sameiningu lögregluembættanna var kynnt var gert ráð fyrir því að stöðugildi lögreglumanns rannsóknardeildar yrði fært frá Vestmannaeyjum á Selfoss. Vestmannaeyjingar mótmæltu því hins vegar harkalega og fengu að halda sínum manni. Þá var rætt um að eyrnarmerkja fé til þess að fjölga um einn á rannsóknardeildinni á Selfossi en úr því hefur ekkert orðið.

Þorgrímur Óli segir að þegar svo mikilli fjölgun mála sé ekki fylgt með auknum mannafla bitni það á starfi lögreglunnar. Hann nefnir minni málin sérstaklega og segir að mörg þeirra neyðist til að sitja á hakanum á meðan stærri málunum er sinnt.