Kynna verðmat Gagnaveitunnar ef ekki koma fram gild rök fyrir leynd

Meirihluti sjálfstæðismanna og framsóknarmanna í borgarráði hafnaði því í dag að létta leynd af verðmati á Gagnaveitu Reykjavíkur, dótturfélags Orkuveitu Reykjavíkur, sem áður var Lína.net. Verðmatið verður birt á næsta borgarráðsfundi en þá sem trúnaðarmál og hyggjast borgarfulltrúar Samfylkingarinnar kynna það einhliða komi ekki fram gild rök sem styðji leyndina.

Fram hefur komið í fjölmiðlum að bæði Glitnir og Landsbankinn hafi metið virði fyrirtækisins en leynd hefur hvílt yfir niðurstöðunum. Heimildir Fréttablaðsins herma hins vegar að verðmætið sé um ellefu milljarðar króna og geti orðið nærri 30 milljarðar árið 2011.

Á fundi borgarráðs í dag vildu fulltrúar Samfylkingarinnar að verðmatið yrði gert opinbert. Meirihluti Framsóknarflokks og Sjálfstæðisflokks varð ekki við því eftir því sem fram kemur í tilkynningu frá Degi B. Eggertssyni, oddvita Samfylkingarinnar í borginni. Hins vegar á að kynna matið á næsta fundi borgarráðs en þá sem trúnaðarmál.

Samfylkingin lét bóka á fundinum í dag að Orkuveitan hafi látið meta virði Gagnaveitunnar í stjórnartíð Guðlaugs Þórs Þórðarsonar sem stjórnarformanns OR, en hann var helsti gagnrýndandi Gagnaveitunnar. „Hafi þetta verið leiðangur til að sanna að áralöng gagnrýni hans hafi átt við rök að styðjast mistókst það herfilega," segir í bókuninni.

Segir Samfylkingarfólk að ekki verði unað við það að verðmatið verði trúnaðarmál. Einu hagsmunirnir sem þar sé verið að verja séu pólitískir hagsmunir Sjálfstæðisflokksins en áralangur málflutningur þeirra og gagnrýni á stofnun Gagnaveitu Reykjavíkur sé að engu orðinn með ofangreindu verðmati.

Almannahagsmunir séu hins vegar afdráttarlaust þeir að sannvirði Gagnaveitunnar verði dregið fram í dagsljósið. Samfylkingin muni fylgja því fast eftir og áskilji sér rétt til að kynna verðmatið einhliða komi ekki fram gild rök sem styðji leyndina.