Blaðamenn hverfa úr starfi vegna markaðsvæðingar fjölmiðlanna

Margvíslegar ógnir steðja að blaðamennsku og hafa margir reyndir blaðamenn dottið úr leik síðustu misseri vegna markaðsvæðingar fjölmiðlanna.

Þetta kom fram í fjölsóttu erindi Birgis Guðmundssonar, lektors í fjölmiðlafræði við Háskólann á Akureyri. Yfirskrift fyrirlestrar hans var „Þegar markaðsvæðing og arðsemiskrafa rífa hjartað úr blaðamennskunni" . Þessir þættir krefjast þess í síauknum mæli, að sögn Birgis, að magn og afþreying sé tekin fram yfir gæði og alvöru.

Minna starfsöryggi er á ritstjórnum en nokkru sinni fyrr, segir Birgir, og vitnar til samevrópskra rannsókna. Metfjöldi af vönum fréttamönnum hefur helst úr leik, jafnt innan lands sem utan, en nýliðar eru ráðnir í staðinn, oft í lausamennsku. Sjálfstæði blaðamannsins er því ógnað.

Hluti almennings er hættur að gera greinarmun á bloggi og fréttamennsku, sem er varasamt, segir Birgir.