Pólitískar ástæður að baki hótun Útlendingastofnunar

Atli Gíslason þingmaður Vinstri grænna og lögmaður segist ekki sjá annað en að pólitískar ástæður liggi að baki hótun Útlendingastofnunar um brottvísun breskrar stúlku úr landi en hún hefur tekið þátt í mótmælum Saving Iceland.

Eins og fram kom í fréttum okkar í gær hefur lögreglan farið fram á það við Útlendingastofnun að Miriam Rose, liðlega tvítugri breskri stúlku verði vísað úr landi.

Stúlkan hlaut nýverið dóm fyrir að klifra upp í burðarvirki á vinnusvæði Bectel á Reyðarfirði en hún sat af sér sekt með 8 daga vist í fangelsi.

Stúlkan, sem er trúlofuð íslenskum pilti, fékk nýverið bréf frá Útlendingastofnun þar sem fjallað er um mögulega brottvísun og bann við endurkomu til Íslands.

Í bréfinu frá Útlendingastofnun kemur meðal annars fram að vísa megi útlendingi úr landi ef háttsemi hans felur í sér raunverulega og nægjanlega alvarlega ógn gagnvart grundvallarþjóðfélagssjónarmiðum.

Atli Gíslason, lögmaður, segir að ef samræmi ætti að vera í störfum Útlendingastofnunar ætti stofnunin að vísa úr landi fjölmörgum Pólverjum sem verða uppvísir að því að aka undir áhrifum víns og skapa með því mikla hættu. Atli segist ekki sjá annað en að pólitískar ástæður liggi að baki þessari hótun Útlendingastofnunar um brottvísun stúlkunnar úr landi.