Fyrsta olíuhreinsistöðin á Íslandi sett upp í Bolungarvík

Bolvíkingar ætla að setja upp fyrstu olíuhreinsistöðina á Íslandi í miðjum kaupstaðnum en rannsóknir standa nú yfir á hagkvæmni olíuvinnslu í Bolungarvík. Ekki er um að ræða hefðbundna olíuhreinsistöð heldur á að vinna eldsneyti úr fiskúrgangi.

Slóg úr fiski fer gjarnan til ónýtis og tapast þar mikil orka eða olía sem fólgin er í þessu hráefni sem einnig má nýta í aðrar afurðir, eins og áburð. Bolvíkingar ætla nú að ráðast í að ná verðmætum úr slóginu en Bjarni Páll Ingason hefur unnið að verkefnum með Bolungarvíkurkaupstað til að nýta slógið.

Segja má að með þessum aðgerðum Bolvíkinga sé að vissu leyti verið að raungera áform Vestfirðinga um að reisa olíuhreinsistöð í fjórðungnum.

Grímur Atlason, bæjarstjóri í Bolungarvík, segir að með auknu framlagi til vísinda og rannsókna megi gera sjávarútveginn enn umhverfisvænni en hann er í dag auk þess sem afurðir verði til úr hráefni sem áður var hent.

Grímur segir að fullvinnsla á slógi geti auk þessa nýst sem fóður í fiskeldi og í dýrar heilsuvörur. Hann telur að sóknarfæri séu veruleg fyrir vörur unnar úr þessu hráefni.

Um 12 hundruð tonn falla til árlega af slógi hjá Bolvíkingum, af því er á annan tug prósenta fiskifita sem má breyta í eldsneyti. Nýtanleg dísel olía(bio-dísel) úr þessu magni er því nálega 200 tonn sem dugar fyrir nær alla handfærabáta í Bolungarvík á einni sumarvertíð.

Þess má geta að maís, bygg og hveiti hækkaði á tímabili um meira en fjórðung vegna aukinnar eftirspurnar. Sú spurn er að mestu til komin vegna aukinnar framleiðslu á eldsneyti úr þessum hráefnum. Af þessum sökum má ætla að slóg verði dýrt í framtíðinni eins og aðrir orkugjafar.