Fá 30 þúsund aukalega á mánuði vegna álags

Björn Bjarnason dómsmálaráðherra hefur ákveðið að greiða öllum starfandi lögreglumönnum sérstakt tímabundið álag upp á 30 þúsund krónur á mánuði samkvæmt samkomulagi sem Landssamband lögreglumanna hefur gert við stjórnvöld. Þetta kemur fram á vef landssambandsins

Landsambandið hefur að undanförnu átt í viðræðum við fjármálaráðuneytið og dómsmálaráðuneytið um kjör lögreglumanna og varð niðurstaðan sú að öllum starfandi lögreglumönnum verður greidd 30 þúsund króna álagsþóknun mánaðarlega frá 1. október og fram til 31. október á næsta ári þegar kjarasamningur við yfirvöld rennur út. Samkomulagið er gert á grundvelli ákvæða í núgildandi kjarasamningi sem er frá árinu 2005.

Fram kemur á vef Landssambands lögreglumanna að þeir lögreglumenn sem eru í hlutastarfi fái álagsgreiðslu í samræmi við starfshlutfall. Gripið er til greiðslnanna vegna aukins álags á lögreglumenn en fjölmargir hafa horfið úr starfi á síðustu mánuðum og þá hafa verkefni aukist eftir lögreglulið voru sameinuð um síðastliðin áramót.

Telur stjórn landsambandsins að niðurstaðan sé ásættanlega og verði vonandi til þess að stöðva þá óheillaþróun sem hafi blasað við undanfarið og verði jafnframt hvatning til lögreglumanna til áframhaldandi góðra verka.