Var vanhæfur til að fjalla um ráðningu aðstoðarskólastjóra

Fulltrúi Samfylkingar í skólanefnd Kópavogs var vanhæfur til að taka þátt í afgreiðslu á ráðningu aðstoðarskólastjóra Smáraskóla. Að þessu kemst bæjarlögmaður Kópavogs sem kynnti niðurstöður sínar á bæjarstjórnarfundi í gær.

Gunnar I. Birgisson, bæjarstjóri í Kópavogi, óskaði eftir því að lögmaðurinn úrskurðaði hvort Þór Ásgeirsson skólanefndarmaður hefði verið vanhæfur til að sitja fund nefndarinnar þar sem ákvörðun var tekin um hver skyldi ráðinn skólastjóri og aðstoðarskólastjóri Smáraskóla. Einn umsækjanda í starfið og Þór eru systkinabörn.

Fram kemur í áliti bæjarlögmanns að Þór hafi vikið við afgreiðslu umsóknar um stöðu skólastjórans vegna þessa. Frændi Þórs var hins vegar ekki ráðinn í þá stöðu. Þegar kom að afgreiðslu umsókna í stöðu aðstoðarskólastjóra þá mælti nýráðinn skólastjóri með því að frændi Þórs yrði ráðinn í stöðuna en samkvæmt lögum á skólanefnd að ráða í þá stöðu að fenginni umsögn skólastjóra.

Umsóknin var síðan tekin til formlegrar samþykktar á fundi skólanefndar og leit Þór svo á að ekki væri um eiginlega atkvæðagreiðslu að ræða. Þórður Þórðarson bæjarlögmaður kemst hins vegar að þeirri niðurstöðu að Þór hafi verið vanhæfur til að vera við afgreiðslu málins og hefði átt að víkja af fundi.

Úrskurður bæjarlögmanns mun ekki hafa nein áhrif á ráðninguna enda Þór samfylkingarmaður sem er í minnihluta í bæjarstjórn Kópavogs.