Ekki samstíga um hvort taka eigi upp flatan skatt

Formaður Samfylkingarinnar og viðskiptaráðherra eru ekki samstíga í því hvort taka beri upp flatan skatt. Viðskiptaráðherra vill slíkan skatt og sér fylgismenn í Sjálfstæðisflokknum og hjá Viðskiptaráði.

Formaður Samfylkingarinnar segir það hins vegar ekki stefnu Samfylkingarinnar að taka upp flatan skatt. Viðskiptaráðherra vill taka upp flatan skatt og á þar skoðanabræður úr röðum sjálfstæðismanna. Viðskiptaráð fagnar vegar hugmyndum viðskiptaráðherra.

Svo virðist sem innan beggja ríkisstjórnarflokkanna séu talsmenn þess að einfalda skattkerfið til muna og koma jafnvel á flötum skatti þar sem launþegar og fyrirtæki greiða sama hlutfall af tekjum sínum í skatta.

Björgvin G. Sigurðsson, viðskiptaráðherra er einn þeirra sem talað hefur fyrir flötum skatti. Björgvin segir að í dag greiði fyrirtækin rösklega 26 prósent skatt en einstaklingar tæp 36 prósent. Þennan mun vill Björgvin jafna.

Ingibjörg Sólrún Gísladóttir, formaður Samfylkingarinnar, segir að hugmyndir viðskiptaráðherra séu framtíðarmúsík, meginmálið sé að lækka skatta lágtekjufólks. Það sé ekki á stefnuskrá Samfylkingarinnar að taka upp flatan skatt.

Talsmenn Viðskiptaráðs hafa lengi fullyrt að bæta megi samkeppnishæfni Íslands með því að koma á flötum skatti á þann veg að tekjuskattur einstaklinga, fyrirtækja og virðisaukaskattur verði samræmdur.

Geir H. Haarde forsætisráðherra sagði á Viðskiptaþingi í vetur að ef Íslendingar ætli að gera skattkerfið samkeppnishæfara sé það best gert með því að hafa það sem einfaldast og skilvirkast.