Þjónusta skert á fjórum leikskólum

Þjónusta hefur verið skert á fjórum leikskólum á höfuðborgarsvæðinu vegna manneklu. Í morgun fengu foreldrar barna í Brekkuborg bréf þar sem þeim er tilkynnt að þau þurfi að hafa börnin sín heima í tvo daga í byrjun október. Leikstjóraskóli vonar að um tímabundið ástand sé að ræða.

„Við þurfum að skerða þjónustuna tímabundið vegna manneklu," sagði Guðrún Samúelsdóttir, leikstjóraskóli á Brekkuborg, í samtali við Vísi. „Okkur vantar enn fimm starfsmenn og það má lítið útaf bregða til þess að þjónusta skerðist."

Í bréfi sem foreldrar barna í Brekkuskóla fengu sent í morgun kemur fram að dagana 1. til 11. október þurfi leikskólinn að skerða þjónustu. Eru foreldrar beðnir um að velja tvo daga á tímabilinu þar sem barnið verður heima í stað þess að fara í skólann. Í bréfinu er ennfremur tekið fram að um neyðarúrræði sé að ræða og að mögulega geti komið til frekari skerðinga að tímabilinu loknu.

Enn vantar 140 starfsmenn á leikskóla í höfuðborginni. Þegar ástandið var hvað verst í lok sumars vantaði 250 starfsmenn.

Auður Jónsdóttir, hjá leikskólasviði Reykjavíkurborgar, sagði í samtali við Vísi að nú væri búið að skerða þjónustu á fjórum leikskólum á höfuðborgarsvæðinu. Auk Brekkuborgar væri einn skóli með skerðingu einn dag í viku. Þá eru tveir leikskólar með skerðingu eftir klukkan tvö á daginn. Auður segist vona að um tímabundið ástand sé að ræða enda sé nú verið að ráða fólk til starfa. „Ég á ekki von á því að þjónusta verði skert á fleiri leikskólum," sagði Auður.