Spítalinn fer gegn stefnu ríkisstjórnarinnar

Ásta Möller, formaður heilbrigðis- og tryggingaenfndar, segir að áform Landspítalans um að ráða til sín erlenda hjúkrunarfræðinga til starfa sé andstætt stefnu ríkisstjórnarinnar. Það sé yfirlýst stefna að auka samstarf við einkaaðila í heilbrigðisþjónustu. Hún segist ekki hafa trú á því að spítalanum takist að fá 90 erlenda hjúkrunarfræðinga til starfa hér á landi.

Í viðtali við Ísland í dag sagði Ásta að sú leið sem Landspítalinn hafi kosið að fara, að segja upp samningi við innlend ráðningafyrirtæki og ráða í stað þess útlendinga inn á spítalann, sé varhugaverð.

„Ég óttast að þetta geri það að verkum að við missum hjúkrunarfræðinga úr störfum í heilbrigðiskerfinu og að vandinn muni aukast," segir Ásta. Hún bætti því einnig við að hún efist um að spítalanum takist að fylla í stöðurnar með erlendum hjúkrunarfræðingum. Það hafi verið reynt áður með litlum árangri.

Hún bendir einnig á að erlendir hjúkrunarfræðingar nýtist ekki sem skyldi á meðan þeir séu að ná tökum á tungumálinu og að reynslan hafi sýnt að þeir endist í stuttan tíma hér á landi, enda sækist flestir eftir því að starfa á sínu málsvæði.