Eiga yfir höfði sér fjársektir í Noregi

Norskt strandgæsluskip færði fjölveiðiskipið Vilhelm Þorsteinsson EA til hafnar í Sortland í Norður Noregi í gær og á skipstjórinn yfir höfði sér fjársektir.

Skipið hefur undanfarið verið að síldveiðum við Noregsstrendur samkvæmt samkomulagi Íslendinga og Norðmanna um veiðar úr norsk-íslenska síldarstofninum. Þegar haldið var heim úr síðustu veiðiferð láðist að gefa upp aflann eins og á að gera.

Þegar Samherjamönnum varð það ljóst létu þeir Fiskistofu og Landhelgisgæsluna fylgjast með löndun hér á landi og meta magnið. Þær upplýsingar voru svo sendar til Noregs en um leið og Vilhelm kom á miðin á ný var honum snúið til hafnar.

Kristján Vilhelmsson útgerðarstjóri á allt eins von á að skipstjórinn verði sektaður en býst við að málið leysist í dag.